Federasaun Tenis Timor Leste (FETTIL) iha Sabado 29 Jullu 2023 halo lansamentu ba treinu intensivu atleta Junior U8 – U14 no Lansamentu ba Website FETTIL nian. Lansamentu ida-ne’e atende hosi Presidente Confederação Desportiva Timor Leste CDTL, Inan-aman, ekipa FETTIL, Klubu sira hamutuk ho atleta no treinador sira.
Iha diskursu Presidente Federasaun Tenis nian, esplika katak objetivu hosi treinu intensivu ne’e atu prepara atleta tenis hosi idade ki’ik liuhosi treinu no akompañamentu ne’ebé estruturadu. Ho treinu ida-ne’e atleta junior sira bele dezenvolve sira nia kapasidade téknika no abilidade atu joga tenis ho diak no preparadu atu tuir kompetisaun nasional no internasional. Federasaun sei esforsu makaas atu halo susesu treinu programa ida-ne’e, nomos sei utiliza website hodi fornese informasaun ba públiku no entidade negosiu sira.
Iha parte seluk Presidente CDTL, Sr Macario Sanchez kongratula ekipa federasaun ne’ebé servisu makaas hodi bele halo lansamentu ba atividade ida-ne’e no motiva atleta sira atu bele aproveita oportunidade no treinu ho disiplina, atu nune’e iha tempu oin mai bele sai atleta ne’ebé diak no bele kompete iha nivel internasional. Nia akresenta katak, Confederação sei esforsu makaas hodi apoiu federasaun sira atu dezenvolve desportu ida-idak. Relasiona ho lansamentu website ne’e Sr Sanchez, hato’o katak importante tebes atu federasaun kontinua komunika atividade sira ba públiku hodi hetan suporta moral no material hosi komunidade nune’emos hosi entidade negosiu sira.
Eventu lansamentu ne’e lao ho susesu mezmu kondisaun natureza udan boot ne’ebé perturba programa lansamentu.
@MédiaFETTIL
